「窮人生仔」一直是香港網民詬病多年的決定。新聞每有報導家庭倫常慘案發生時，總有網民把生育和貧窮問題兩事扯上關係，不斷批評社會底層的父母無法給予子女更好的物質條件和明日願景，只有上代人將貧困傳承給下一代，造成連綿不絕的家庭悲劇，惡性循環云云。
「人愈大，愈識得多窮人，愈發覺跨代貧窮係有原因。」近日有網民在知名討論區發帖，詳細解釋跨代貧窮的「七宗罪」，狠批貧窮家庭的長輩漠視教育、賺錢門路不足、缺乏理財觀念、拖累子女等。
該帖留言區引起熱議，當中很多其他網民對部份窮人家庭的「原罪」深有共嗚；但亦都有人覺得樓主偏激，只懂怨天尤人，是「受害者心態」作祟。
網民力數跨代貧窮「七宗罪」
該名樓主表示，窮人子女「多數冇乜好結果」，大部份是由於以下跨代貧窮七大原因而導致︰
1、成個家族冇「帶路人」
屋企冇人係做教育、做公務員／做官，甚至連做生意都冇；一代代都係打工仔女。長輩冇膽識，睇唔透大勢。後生一有少少事業諗法，就被潑冷水：「唔好亂嚟啦，我食嘅鹽多過你食嘅米。」
2、唔重視教育
屋企有文化嘅唔多，口講知識有用，但骨子裡對知識冇敬畏。賺唔到錢、過得唔好，就怪命水唔好、運氣差；唔願參與仔女成長教育，直接丟畀唔識字嘅老人家帶，情願自己出去返工搵多幾蚊。
3、唔明白「錢可以生錢」
財路好窄，幾乎淨係靠體力同時間。唔明點解物價會升、點解錢會貶值，覺得地產、股票、基金都係投機取巧。
4、慣性索取
「靠人」嘅毛病根深蒂固：喺屋企靠父母，出到去靠朋友，將來靠仔女；永遠將希望寄託喺人哋身上，成日向外搵原因，唔肯反省自己。
5、冇危機意識
後生仗住身體好、力氣夠，就搏命做苦工，仲染上煙酒賭等壞習慣；到老一身病，唔單止自己嗰啲積蓄唔夠，仲要後輩喺時間、金錢、精力上付出大量成本去照顧。
6、認知匱乏，改命機會少
賭徒個圈子得賭徒，打工仔個圈子得打工仔，破唔到圈，結果大部分人被原生家庭思維困住；難以接觸上層社會，接觸唔到精英，又唔鐘意讀書，世世代代都只能賣勞力同時間為生。
7、無人脈
睇吓潘同學就知人脈幾重要，就算犯下彌天大錯，成個System都會攬佢。
樓主的大部份觀點，相信並非原創，近日在不同社交媒體平台已有類似版本在傳播，所以真正精彩的地方，是在留言區。
「呢個post應該做年經」
「好似講緊本人屋企咁」、「我唔鍾意你出post講我」、「真，父母三代符合晒」近頂樓的一些人士如此稱，反映他們對樓主的觀點有所共嗚：「社會需要呢d人」、「社會都需要有人去麥當勞炒薯條」
更有人大讚樓主出帖警世，富有教育意義，表示：「呢個post應該做年經（指應該每年重溫一次），每年暑假比啲細路參考，幫助佢哋認清人生目標。」
但同時，都有網民反感樓主帖文，暗串：「仲要依啲人通常鍾意『賴人賴物』、『受害者心態』！」、「呢個po咪exacly賴父母」。
間唔時有依d post講窮人點點點，Facebook突（特）別多依d毒雞湯，除（隨）時寫文條友都係住劏房
最反感長輩潑冷水
及後更多網民加入討論表示，對於文中第一點「成個家族冇『帶路人』」提出之長輩恃老賣老、態度消極的弊病「最有同感」。
對於成就不高的上一代喜歡打擊勤力年輕人士氣的習性，他們異口同聲地呻….
長輩冇膽識，仲要乜都潑冷水先。明明自己乜都唔識仲喺到指點江山
真，啲親戚好煩。佢哋自己都唔掂，有咩資格係度話我
係，外母一家食飯一路講邊碟餸邊度買餸幾錢斤，完全唔想知
佢哋就係冇膽識乜都唔識先窮。佢哋講乜相反咁做咪啱囉。如果佢哋覺得你做得啱，應該要反思自己係咪做錯咗嘢
啲住緊公屋既親戚或者自己老豆老母，學人講創業投資買樓人生方向乜乜，可以唔洗理。相信自己最緊要
佢地係有料既話一早成功左啦。佢地個年代識諗既，衰極都起碼有層樓揸手啦
真，佢地有咁勁今日就唔會咁兜踎
1真係，乜都限制住。細個買件衫都要經佢地批，「你老豆唔鐘意呢d款喎」
奉勸各位巴打，父母講嘅野唔好咁上心，太聽話你嘅上限就係你父母
我反而覺得心態影響最大，現實情況係如果上一代能力不足，見到下一代有機會比自己叻嘅時候就嗱嗱聲踩十九幾萬腳先，令本來有機會上流嘅下一代冇曬自信，又充滿負面情緒
同一留言串的其中一人說，若另一半態度消極不給自己面子，也是難受：「都唔止長輩，身邊果個都日日潑你冷水都有影響。」
錯誤教育觀念毒害子女
另有網民批評窮人父母功利市儈，尤其認同第二點「唔重視教育」，認為這類長輩對教育和求知的價值觀有問題，視子女的學業為純粹賺錢工具。
父母既望子成龍，卻不想付出資源來培養與支援小孩的學習能力；要是成績一般，必然強迫小孩盡快放棄讀書，投身社會：「口講重視教育好中，佢地眼中既教育就係成績好，考幾多入咩大學，」
但重視教育應該係，下一代學到「思維」「眼界」「格局」等等而呢啲野先係破局既方法，成堆DSE狀元，好多都只係揀讀醫，佢地係成績好但剩係睇到醫生人工高呢條出路，但個富人思維根本未到
對知識無敬畏。父母對於所有書本以外既知識，都唔鼓勵子女學
窮人生仔，符碌生到件讀到書又識搵錢嘅就會瘋狂曬命：「不枉當初死慳死抵養大你」
眼界決定景界，窮人眼界窄，短視，如果仔女唔識自己諗，跟番父母嗰套，就延續左貧窮
好似以前成日聽有啲父母話讀書冇用，唔好讀咁多，中三好出黎搵錢
如果仔女聽左，咁中三出到黎只可以做送貨侍應，廿幾年後人到中年未俾人炒已經要還神
以前邊有互聯網AI咁發達。細個就掉你去垃圾學校讀到成舊屎就算
讀到就繼續讀，讀唔到就中六畢業好出黎做野
相反意見：學業問題，子女也有責任
亦有網民認為，香港教育目前「走後門」風氣嚴重，窮人注定輸在起跑線：
因為大學入學試係窮人最有機會反cup嘅賽道，而家咁都比有錢人走後門。我戥而家啲後生唔抵，我以前HKAL（高級程度會考）好公平
不過都有相反意見在爭持，一人回應稱：「唔好天真啦，以前一樣有好多後門，可以講以前重黑暗。只係資訊科技發達，依家易左知。反而啲人會收斂啲。依個世界從來都唔公平。」
也有人認為，讀書不成的責任主要在為人子女身上，多過父母的冷眼旁觀；而且即使學業沒有出路，從事勞動力工種一樣有可能成功，不努力而失去上流機會，是咎由自取。一人冷嘲熱諷：
自己有冇料讀唔讀到書，心知肚明啦
香港有免費教育，基本你用心就去到大學；真係冇心機，就17歲出黎做野
香港有學徒計劃，再唔係就入地盤三行，幾年已經升師傅。好多老闆其實好比機會後生仔
但好多做幾日就話辛苦唔撈，呢d又關上一代事？
爭持之間，反調者也遭唱反調。「香港唔同大陸，你腦力唔掂就唔該唔好怕辛苦做下勞力工作，人脈就係咁儲返黎。」有網民這樣回應後，隨即遭另一人「串爆」：
出嚟做咕哩就可以儲到人脈？咕哩？人脈？地盤咪又可以識到D職安真漢子，依家地盤都冇得你做啦
做死一世咕哩啦死咕哩，無知識千祈咪生仔
不懂「錢搵錢」也是致命傷
對於樓主提出的第三點「唔明白『錢可以生錢』」，網民覺得有一定道理：「身邊有d人，真係零投資。買下美債/收息股/etf都好過擺舊錢係銀行日日蝕通脹啦。」
亦有人覺得跟窮人不善理財是跟第五點「冇危機意識」息息相關，除了缺乏眼光，也沒膽量，但最大致命傷是惡習纏身，沒有預算規劃的觀念：
識定期都還好。最怕真係漂煙酒賭等壞習慣，成個家族都無個叻，仲有一堆窮親戚等住你去幫手養
窮人真係可能淨係識做定期，買債都唔識
好多對所有同錢有關佢又唔識既野有恐懼，佢地可能聽過唔知邊個邊個投資蝕左好多爭人好多錢，但佢地唔會問到底炒乜蝕，只知唔好做就唔會錯
網民主張由自己做起、切斷孽緣
「當自己可以帶頭，但就決定唔生，斷左個貧窮佢。」一名網民認為，這是解決文中第一點可行方法。
是但啦，反正都冇下一代，最後嘅苦自己受埋算數
窮人真係唔好有下一代，棧害咗人一生，仲要一代傳一代
一名勇敢網民有獨立精神，主張不玩社會經濟的遊戲，諷刺樓主：
你蠢唔識逃走，係你問題
讀大學住hall，畢業直接唔返去。甚至返緊工直接租好樓，人間蒸發
直接甩哂所有麻煩，當自己孤兒，人生已經順利返唔少
但回應他的人，提醒親情始終可貴：「其實當你遇到乜事，屋企人通常都係最唔會出賣你嘅人。」
窮人的試錯成本太高
其中一名高智商網民，沒有前述人士主張「絕育」那麼負面，卻一矢中的地點出，貧窮家庭的最大劣勢是在於「求職和發展事業上，全無後盾支撐」。簡單言之：試錯成本太高。
呢啲都唔係直接原因，直接原因係試錯成本，富人嘅子女可以不斷試，試到走啱條路
窮人嘅原生家庭比唔倒第二次機會下一代去做backup，失敗一次就落地獄
成本太高導致窮人嘅下一代唔敢試，冇開始完全就冇結果
有人深表認同：「真呀。試完一次唔啱就比人呃晒錢，然後乜都唔敢試了。」
無錯。一個屋企有負擔嘅人假設儲咗1球。可能佢根本唔敢去投資（輸咗點算）/肯去投資結果輸咗，都要好長時間儲返；
另一個屋企無負擔嘅，搏咗輸哂無所謂，就算負埋仲可以搵屋企人（借）住先；
根本試錯成本一個天一個地。
心態，決定境界
其他網民藉此引伸出另一觀點，認為跨代貧窮除了是上代人把財務困境傳給下代人外，下一代也繼承了先輩「心靈上的貧窮」，主要是自卑心理。此問題也是為樓主觀點一「成個家族冇『帶路人』」的禍根：
我反而覺得心態影響最大，現實情況係如果上一代能力不足，見到下一代有機會比自己叻嘅時候就嗱嗱聲踩十九幾萬腳先，令本來有機會上流嘅下一代冇曬自信，又充滿負面情緒
踩嘅主因歸根究底就係上一代自悲，見到有家人比自己叻就feel到自己廢
所以正確方向係focus自己最叻嘅地方不斷突破，多聽正面勸告/意見，其實野係noise嚟，擺低move on，咁就見到曙光喇